人到中年有點發福, 但係又為食, 咁就唯有好好鍛鍊身體… 一於踩單車悠閑搵好嘢食, 來個單車悠遊, 哈!
沙田到大埔
晨咁早由沙田出發至大埔墟, 來回大約30公里, 以我嘅噸位可以消耗400大卡, 咁就可以放肆啲吔個我至愛嘅高脂港式早餐加埋杯唔使少甜嘅凍奶茶, 正!
過了雙子橋便是馬場, 可以聽到清翠嘅馬蹄聲, 不過馬馬嘅便便味一定會令你精神為之一振。
水警基地附近路段有一小片茂密的樹叢, 從下面經過像進了劇院內聽百鳥爭嗚, 很是熱鬧; 但是絕對不可以停留, 否則好容易中炸彈 ( 雀仔 poo poo 是也)。
入廟拜神
過咗吐露港段便到達大王廟, 可能淨係得我一個善信嘅關係, 廟祝對我熱情非常, 好似貼身導遊咁同我解釋拜神嘅步驟, 仲老實不客氣一紮十蚊嘅香收我廿皮就塞落香油箱唔使找。
泊車响大埔廣福橋旁邊, 行經每次入大埔必到嘅富善街街市, 特別喜歡呢度係因為呢度仲保留著老香港風貌, 同埋有一間古風文武二帝廟, 有隻超hea嘅懶貓叫 Raymond, 佢最鍾意周圍日光浴。
搵食咯
終於嚟到大埔墟街市熟食中心嘞, 必選我至愛嘅世記竹筍豬扒麵(如果同朋友嚟可以叫一個雞翼麵換啲嚟食), 同埋惠陽茶水檔嘅餐蛋菠籮, 惹味得嚟唔花巧!
回程
踩單車回程是讓我糾結的事, 因為太陽會猛啲、單車又多啲、食飽飽又唔想郁得太多… 不過, 為了抵銷啱啱食咗咁邪惡嘅嘢, 頂硬上啦!
後感
做隻廟宇貓貓好幸福, 只要不在神枱poo poo, 便一定有神靈庇祐。
